ALAM MINANG KABAU
Suri tagantuang kabauleh, bangkalai talatak nak nyo sudah, usah manjadi angan juo lah lamo kanduang niak. Sajak samulo cinto hati io di alam Minangkabau, luak taganang nak basauak, suri tagantuang nan batanun kayu batakuak barabahan, janji babuek batapati, lah tapakai janjang tampek naik, lah batampuah tanggo tampek turun, duduak baiyo jo batido sajak di korong dengan kampuang, lapeh ka koto ka nagari, sampai kaduo kelarasan, di dalam luak nan tigo sarato panjang bakaratan. Laweh nan nyato basibiran, lah bulek jantuang kakalupak. lah bulek kato ka mupakik. Adaik lah nyato ka di isi limbago nan nyato ka dituduang, nan mamakai adaik nan kawi manuang limbago nan tajarang, kajadi pusako kamudian tibo di anak jo cucu, kok ilang bana curiang di batu, tulisan limbago tingga juo, tantang niaik jo tujuan sarang tasangkuik kanan tinggi, lah jaleh tasanda ka nan gadang samo bacinto ka nan baik.
Lah tigo tali sapilin, lah tigo tungku sajarangan, lah aso di dalam niaik, antaro adaik nan kawi di Minangkabau baitu pun sara’ nan lazim.
Ujuik kato buah rundingan sakadar paham dikahandaki mangingek maso nan ditampuah, buliah barupo dapek diliek, baraso dapek dimakan pado maso nan katibo.
Pulai bapangkek naiak tingga rueh jo buku. Manusia bapangkek turun maninggakan barih jo balabeh, mati harimau tingga balangnyo, mati gajah tingga gadiangnyo, mati manusia tingga jasonyo, nak tingga coreang jo barih, nak tampak bangunan nyato tando bapakai dalam adaik. Barek samo dipikua, ringan samo di jinjiang. kabukik samo mandaki kalurah samo manurun.
kok ado niaik cinto hati di dalam Minangkabaau. Kamudiak nyato saataan galah ka ilie sarangkuah dayuang lah di tatak hari jo katiko. Hari baik katiko elok, sadang katiko bungo kambang, katiko matohari sa panggalahan sadang ambun mulai mangariang itulah saat na di paliah untuak manyampaian niaik hati, karantau di kirim surek kalauik kulansiang lapeh kaluak basisiah dicarano dakek makanan panggia maliputi alam Minangkabau.
Dari salilik gunuang Marapi saedaran gunuang Pasaman, sajajaran talang jo sago, lapeh ka pintu rajo ilie. Durian di lakuak rajo sampai ka si pisak, pisau anyuik si Alang balantak basi hinggo aia babaliak mudiak.
Salingka gunuang Pasaman saedaran Batang Batahan, sampai ka Sasak jo Kinali ka sentang jo Padang Tujuah, nan di pituan di parik batu ka rokan pandalian baitupituan di Padang Nonan, Kampa jo lipek kain, ka kuntu Gunuang Sailan Rantau nan kurang aso duo puluah lapeh kapucuak Jambi sambilan lurah, Sahinggo lambah mananti Alam Surambi sungai Pago Cukuik banda nan sapuluah lalu ka Tapan Indopuro, cukuik jo Kubuang Tigo Baleh Sijunjuang jo Koto Tujuah, Koto sambilan nan di hilie, Koto Sambilan nan di Mudiak sampi ka Jambak Jambu Limpo, ka Sitiuang Koto Basa jo Siguntua Sungai Lansek.
Luak Agam, Luak nan Tangah, Biaro jo Balai Lurah, Ampek Lambah jo Panampuang Kamang Ilia jo Kamang Mudiak magek dengan Salo, Gaduik Tilatang Kamang sarato jo Kurai Banuhampu Sianok jo Koto Gadang, Guguak Tabek Sarojo, Lawang Tigo Baleh sampai Karanah Palembayan lalu ka Maninjau Sungai Batang Mangopoh jo Batu. Kambiang Lubuak Basuang Sungai Garinggiang, Sampai ka Tiku Pariaman lalu ka Toboh Pakandangan Ka sintuak ka Lubuak Aluang ka Sunua jo Kurai Taji Tapi nan sabarih indak lupo 2x XI anam lingkuang, pauh kamba jo Tujuah Koto, Limau puruik Kampuang Dalam. Sampai Kinali Tigo koto
Luhak Nan Bunngsu Limo puluah
Rajo di sundi Payo Kumbuah, Rajo di Ulu Banda Dalam Sarato Rajo di Lareh di Tanang Muaro Lakun, Rajo di Luak Aia Tabik lalu ka niniak nan barampek dan Sikokoh Pangan Tuo higgo si Sauak Sungai Rimbang langkoklah alam kasadonyo, lapeh ka alam Limo Koto, ka Kuok ka Bangkinang, ka Salo Aia Tirih, Lapeh Kalimo jo Rumbio, Tujuan Dana nan tasabuik ka pado koto Niniak Mamak Alim Ulama jo Tuanku Manti Pagawai Adaik Dubalang jo Ampang Limo Nan mudo pambimbiang dunie, bundo kanduang samo di dalam, cadiak pandai pagaran kokoh nan mamegang sako dalam alam yo di Alam Minangkabau, luak nan Tigo lareh nan duo.
