OCU ONLINE

Angku, tuan Angku bagai nan disuduik,_-------- sarato kito nan rapek bakarapatan.

Sungguahpun baduo jo batigo Angku nan tiimbau diawakalam nan sapatah, dalam sariaik jo akikaik, niniak mamaklah nan gadang basa batuah, nan cadiak nan tau pandai, cadiak nan buliah bakeh baguru, tau nan buliah bakeh batanyo.

Tau marapek dalam aia, pandai manarah manilantang, tau mauleh tak mambaku, pandai mambuhue tak mangasan, daiateh nan duo barih kadudukan, nan tigo langgam persilaan, sarato dunsank jo sudaro adiak kakak, ipa bisan dalam korong kampuang nanko.

Sumarak reno jo tapian pamenan kampuang jo halaman. Ampun lah ambo dek Panggulu, Pangulu banyak nan sati, rang gadang banyak nan batuah, tuangku juo banyak nan kiramaik.

Disusun jari nan sapuluah, dimintak maaf banyak-banyak, pihak kapado pasambahan, Indak dirantnag bana bak banang, indak disusun bana bak maatok, hanyolah kapanyusun kapaatok pamulian sambah jo panitahan, sambah dipulangkan pado ALLAH, panitahan diparirikan dijumalah Angku Pangulu nan gadang basa batuah.

kumbali panitahan kabakeh Angku.

Sapartinyo adaik kato nan kadipasambahan, sajak samulo sumua bakali, saasa rantiang bapatah, nagari bauni ba Pangulu badiri dalam nagari, mandirikan adaik jo pusako, managakan cupak jo gantang, Adaik tadiri kabapakai, cupak tatagak kadiisi, limbago tacakah kadituang, jalan tarantang kadituruik.

Adopun jalan duo kadituruik, kato duo kadipakai.

jalan nan duo kaditurik, satu jalan karano ALLAH, kaduo jalan karano dunia.

Baa jikok jalan karano ALLAH, iyolah iman, Isalam, Tauhid, Mugrifatullah, mangucapkan kalimah nan duo patah, sarato mangarajoan sunaik jo paralu, itupun tando jalan karano ALLLAH.

Baa jokok jalan karano dunia, iyolah sorak sorai, hiru biru, larak lereang, sabuang cancang, minum makan, katik bajamu baguntiang gombak diateahnyo.

Kato nan duo kadipakai, satu kato buek, ganok kaduo kato pusako.

Baa jokok diateh kato buek, buleknyo sagiliang, pipihnyo satapak, kabulatan aia kapambuluah, kabulatan kato jo mufakaik, painyo tampak pungguang, datangnyo tampak mungko, dibubuik layua diasak mati.

Baa jikok diateh kato pusako, satapak indaknyo naiak, satapak indaknyo turun, nan idak lupuak dek hujan indak lakang dek paneh, adaik lamo pusako uasang, jalan rayo titisan batu.

Jauhnyo buliah ditunjuakan, ampianyo buliah dikatokan, mah lah bahadis, lah badalia, lah babab, lah bapasal, lah bakias, lah baijmak, itulah adaik nan sapanjang jalan, cupak nan sapanjang batuang, nan baico nan bapakai, nan basasok bajarami, bapandan bapakuburan, kok warih untuang manjawak, pusako untuang marunngguhi………

Iyo ka bakeh Angku sigaji alek (sialng nan bapangka).

Sungguahpun iyo kabakeh Angku sambah jo titah ditibokan, * mako sarapeknyolah Angku Pangulu nan gadang basa batuah sarato dunsanak jo sudaro, adiak jo kakak, ipa, jo bisan, ahli nan saisi rumah nanko. Indak tabilang jo taratok hannyo kapambilang paatok pamulian sambah jo panitahan. Sambah dipulangkan pado Allah panitahan diparirikan kahadapan angku panggulu nan gadang basa batuah, * kumbali salam panitahan kabakeh Angku sigaji alek kami.

Balabek gadang

Sapartinyolah adaek kato nan kadipasambahkan kabakeh Angku diateh nan mamakain sapanjang adaek nan marungguhi sapanjang pusako, kok silang dibari bapangka , jumalah karajo dibari bajunjuang.

Diateh silang nan bapangka jumalah karajo nan bajunjuan, kok panek namonyo alah baparantian, kok palak namonyo alah bapalinduangan, kok auih alah dibari aia, lapa lah dibari nasi, lah sudah minum jo makan lampisan marokok jo makan siriah, rokok sabatang alah abih, siriah sakapua alah masak.

Baa dinan iko kini, dek karano rokok sabatang alah abih siriah sakapua alah masak, kok lain nan takana dihati nan tak hilang dimato kami nan jauh manjalang hampia manuruik, silang nan bapangka jumalah karajo nan bajunjuang alah kok patuik bana dikatangahkan. kok bana namo nyo nak dibaok lalu ko dilua bana nak batimbang bakacak di angku sikaji alek kami. Sakian kaji dipulangkan bakeh Angku.

Jawab:

Lah sampai di Sutan, Iyo kabakeh Sutan juo.

Tapi sungguahpun Sutan nan taimbau dinamo nan tapuji digala, * mangko sarapeknyolah Angku Pangulu nan gadang basa batuah sarato dunsanak jo saudaro, adiak jo kakak, ipa jo bisan, ahli saisi rumah nanko. Indak tabilang taatok hanyolah nan bagala kapambilang kapaatok pamulian sambah jo panitahan. Sambah dipulangkan pado ALLAH, panitahan diparirikan dijumalah Angku Pangulu nan gadang basa batuah *.

Kumbali panitahan kabakeh Sutan.

Ualng bana @ diateh nan mamakaian sapanjang adaek nan marungguahi sapanjang pusako, silang dibari bapangka, jumalah karajo dibari bajunjuang.

Diateh silang nan bapangka jumalah karajo nan bajunjuang, kok panek namonyo alah baparantian, kok palak namonyo alah bapalinduangan. Urusan auih lah dibari aia, litak lah dibari nasi, lah sudah minum jo makan lapisan marokok jo makan siriah, kok rokok sabatang alah abih, siriah sakapua alah masak.

Baa dinan iko kini, dek karano rokok sabatang alah abih siriah sakapua alah masak, kok lain nan takana dihati nan tak hilang dimato kami nan jauh manjalang hampia manuruik, silang nan bapangka dijumalah karajo nan bajunjuang, agak sapatah duonyo alah ko banamo bana dikatangahkan. Kok bana namonyo nak dibaok lalu, kok dilua bana nak batimbang bakacak di Angku sikaji alek kami. @

$ Sapanjang buah kabanaran Sutan nan katangah, lah luruih manuruik adaiek nan lamo pusako nan usang, jalan rayo titisan batu $.

Baa jikok diambo gayuang nan jadi sambuiknyo kato nan kamajadi jawabnyo ;

# Iyolah manuruik papatah jo patitih, a lah nan manjadi papatah jo patitih, jikalau lautan maadang perahu, medan pangulu maadang kato-kato, siriah jo pinang medan adaek, rancak carano dipalegakan, baik rundiangan dipatutuakan.

Baa dinan iko kini supayo rancak carano nak nyo balega, baiak rundiangan nak nyo batutua, nan nyanyo kami lah rancak bana dikatangahkan #.

Lah sampai di angku, iyo kabakakeh Angku juo

Ulang bana. # Iyolah manuruik papatah jo patitih, a lah nan manjadi papatah jo patitih, jikalau lautan maadang parahu, mendan Pangulu maadang kato-kato, siriah jo pinang medan adaik, rancak carano dipalegakan, baiak rudiangan dipatutuakan.

Baa dinan iko kini supayo rancak carano naknyo balega, baik rundiangan nak nyo batutua, nan nyanyo kami lah rancak bana dikatangahkan #.

puji bana.$ Sapanjang buah kabanaran Sutan nan katangah, lah luruih manuruik adaek nan lamo pusako nan usang, jalan rayo titisan batu $.

Baa jiko diambo gayuang nan kamanjadi sambuik nyo kato nan kamanjadi jawabnyo, dibukik nan bakeh rusuah, dilurah nan bakeh cameh, di angan-angan nan tak putuih, dana sedia nan manjalani, kandak kok indak lakeh buliah pintak balaku.

Baa dinan iko kini dek bakarano lah kamurahan pulo diangku, lah kamujuran pulo di ambo, kandak bulih pita balaku ; lai diateh kandak buliah pintak balaku,Insya ALLAH di sabuik sajo nan takana.

Iyo kabakeh Angku juo.

nyo laidu kini kaji nan kadipulangkan kabakeh Angku, & jikok dinan sabuah kandak alah babari pintak alah bapalakuan.

Baa dinan iko kini, dek karano rundiangan kadisabuik papran kadisingkok, dihadapan Angku pangulu nan gadang basa batuah, dikaji malang jo mujua.

Baa jikok diateh bakamujurannyo iyo malah elok susunnyo bak siriah, racak ririknyo bak mambato, luruih barihnyo bak batanam, nan tuo Angku lai tapamulia nan mudo Angku lai takasihi.

Baa jikok diateh makamalangan, kok kurang elok susunnyo bak siriah, kok kurang rancak ririknyo bak mambato, kok kurang luruih barihnyo bak urang batanam. Nan tuo angku kok kurang tapamulia, nan mudo Angku kok kurang takasihi.

Dek karano alam basipaik gawa, manusia basipaik kilaf, kok tasuo kilaf jo kirafaik nak babari di Angku suko jo rila &.

Jawab.

Lah sampai di Sutan, Iyo kabakeh Sutan juo.

Ulang bana. & Jiko dinan sabuah kandak alah babari pintak alah bapalakuan.

Baa danan iko kini, dak karano rundiangan kadisabuik paparan kadisingkok, dihadan Angku Pangulu nan gadang basa batuah, dikaji malang jo mujua.

Baa jikok diateh bakamujurannyo malah elok susun nyo bak siriah, rancak ririknyo bak mambato, luruih barihnyo bak urang batanam, nan tuo Angku lai tapamulia, nan mudo Angku lai takasihi.

Baa jikok diateh bakamalangan, kok kurang elok susunnyo bak siriah, kok kurang rancak ririknyo bak mambatua, kurang luruih barih bak urang batanam, nan tuo Angku kok kurang tapamulia, nan mudo angku kok kurang takasihi .

Dek alam basipaik gawa, manusia basipaik kilaf, kok tasuo kilaf jo kirapaik nak babari diangku suko jo rila.&

Puji bana. $ sapanjang buah kabanaran sutan nan katangah. lah luruih manuruik adaik nan lamo pusako nan uasang, jalan rayo titisan batu $.

Baa Baa jikok diambo gayuang nan kajadi sambuiknyo kato nan kajadi jawabnyo, dek karano kito lai dihadapan Angku Pangulu nan gadang basa batuah, lai babari diangku suko jo rila.

Jawab.

Lah sampai di Angku, iyo kabakeh Angku juo.

Tapi adaik nan lamo kato basitina, kamudian kato basicapek, capaek sajo kabakeh Angku, kacapekannyo diateh kandak buliah pintak balaku, insya’ALLAH disabuk sajo sado nan takana.

Bakeh angku silang nan bapangka salam ditiboan, tapi sungguah pun iyo bakeh angku salam ditiboan mako sarapeknyolah angku pangulu nan gadang ba asa batuah nan cadiak nan tahu pandai cadiak nan buliah bakeh baguru tahu buliah bakeh batanyo. Ibaraik kayu gadang di tangah koto baurek limbago matan babatang sandi andiko barantiang barih jo balabeh badaun rimbun jo adaik ba bungo mungkin jo patuik babuah kato nan bana. Lampisan dari pado itu sarapeknyolah angku jo tuangku suluah bendang dalam nagari ikolah Arab jo Islam jimek sagalo umaik Nabi. Limbak sabalik dari itu sarapeknyo angku nan tahu nan cadiak pandai tahu di ombak nan kadatang tahu di karang nan manonggok pandai manyalam dalam bumi mangkuto di dandang panjang. Sarapeknyolah dunsanak jo sudaro karik baik ipa jo bisan nan diateh tanah nan sabingkah di linduang awan nan sadidh di ateh rumpuik si cambia ani naik dilinduangi awan simabua rampai turun ka Johor lalu ka Patani ka Arab ka Banua Nata ka Limun ka Batang Asai ka Gudam ka Balai Janggo ka Koto ka Pagaruyuang sanan lah ambo ma antakan sambah.

Kambali salam kabakeh angku silang nan bapangka karajo nan bajunjuang. Salam nan akan dikambalian ka bakeh angku sajak sumua dikali sa asa rantiang bapatah pangulu badiri dalam nagari manantukan barih jo balabeh sarato ukua jo jangko kok hujan di bari ba puhun paneh dibari ba asa silang dibari bapangka karajo dibari bapokok.

Ba a jiko di angku silang bapangka lah tasuo malang sakijok mato mujua sapanjang hari lah panjang palangkahan lah sinkek parmintaan lah dahulu baliau dari pado kito jikok dihari nan partamo ba utang niniak jo mamak sarato koroang jo kampuang jimek sagalo umaik Nabi ko utang alah babayia ma alah bamandian jo aia nan amaik janiah bakapani jo kain nan amaik leba lah batanaman ka lahaik nan amaik dalam batimbun jo tanah nan amaik suci riak lah tibo jo galombang upiah lah tibo di salodang maik lah tibo ditampaiknyo.

Jikok dihari nan kaduo badiri adaik jo ma a duik tapuak alang babaleh tampuak siriah bajawek lah datang kami mananti angku silang nan bapangka karajo nan bapokok dek cadiak cati arif budiman laginyo arif bijak sano angku silang nan bapangka sungguahpun arang panuah di aia mato panuah dikasiak namun adaik bapakai juo. Kok jauh batunjuak an rombo kok dakek bakakok an batang pihak dikayu ka ditabang lah basuruah nan mudo matah bacapek kaki baringan tangan tagak marabah bulek mampadaraian dihadapan angku pangulu nan gadang basa batuah ba a dinan iko kini lah bak papatah kato patitih bak pitua angku juo rokok sabatang alah abih di mukasuik alah sampai lamo duduak manaruah panek lamo tagak manaruah paniang siang jan ba abih hari kami nak pai jo parundiangan anku nak tingga jo mupakaik sakian sajo panyambahan salam ma’lum bakeh angku diharap buni nak kambali.

PIDATO MANYUSUN DUDUAK

Sungguah pun angku nan dituntuik di saruan kami nan basamo sumego tumpuan puntiang sariat adaik nan bapakai nasa kapado isi rumah niniak mamak punjungan salam, sananlah salam di tiboan kalau manyiang tampek nan tumbuah manimbang tampaik nan ado tumbuah sarupo iko kini tasabuik adaik nan kawi tapakai sarak nan lazim siang malam di dalam angan patang pagi samo dicinto dunie asah langgam badiri abih hari baganti hari abih musim zaman batuka adaik bapakai salamonyo. Lah asah siang bak hari lah nyato tarang bak bulan limbago sabuang bajuaro galanggang ba ampang limo alek jamu ba sipangkalan iolah niniak dengan mamak sarato sanak jo sudaro karik baik ipa jo bisan.

Namun baataoyo lai kini badiri mungkin jo patuik dek patuik tak mungkin jadi bana bapantang kalintasan kok basuo salah satunyo dek banyak ragulah tibo dek lamo lupolah datang sabok kan baa dek bitu karano alek alah naik alek jamu sapanuah rumah suruan sakorong kampuang lah panuah ronggoh hati mamak santoso haro ibu bapo mancaliak dunie lah tabantang ta anggak batapuak tangan di lenggoang barih ka ujuang kironyo alua bapatutan tampek limbago main andai enggeran gonjoang nan ampek rumah tanggo rangkiang lancang sasak dek alua dengan patuik panuah dek undang kato bana bacupak bagantang panuah cupak adaik labuhan kapanareco lautan budi limbak sabalik dari itu dalam ibo rusuah mandating sabab mangko demikian pihak kapado duduak angku kini kok takilaf janang juaronyo nan tinggi kok kurang anjuang nan gadang kok kurang amba alua di tangah kok ka tapi alua disuduik kok kapangka sekalipun tidak di tampaiknyo lagipun tidak samparono pintak jo pinto nan mandatang itu nan mintak di maafkan diharapkan labiah dikurang kambali bunyi pado kami sakian sajo panyambahan maklum pulang bakeh angku.

PIDATO SIRIAH

Sungguahpun iyo kabakeh Angku dipohonkan sambah jo panitahan mangko sarapeknyolah Ankupangulu urang nan gadang basa batuah nan cadiak nan tau pandai tiang adaik sandi haluan payuang panji marawa basa nyawa nagari adaik kito hulu aia pupusan buluah aia janiah tapian suci duduak jo barih jo balabeh tagak jo adaek jo pusako. Mangko sarapeknyo alim jo ulama sarato bila jo katik sarato saisi siding jum’k nan ampek jurai musajik tahu badalie bamak ana tahu bamantiak bam’ani. Sungguahpun iyo nan sado itu mangko sarapeknyo Angku nan tahu cadiak pandai tahu kampuang pandai mangaji baso jo basi manyilam dalam bumi tau jo ombak nan kadatang. Mangko sarapeknyolah sanak jo sudaro karik baik ipa jo bisan ahli nan saisi rumah ini nan duo barih kaduduan nan tigo langgam pasilaan, tasasak kapanta-panta talimpah lalu kailaman diateh tanah nan sabingkah di linduang awan nan sadidih di ateh rumpuik sicambai ani naik dilinduang awan simabua rampai turun, sahinggo durian ditakuak rajo sinan lah rajo badaulaik maruhun basa ampek alai ppamuncak langgam nan tujuah. ka jho lalu kapatani ka Arab kabanua bata katahun kabtang Asia ka gadam kabai janggo ka kota kapagaruyuang sinanlah rajo alam Minag kabau ulu jantuang limpo bakurang lubuak hati tapian mato suntiang pamenan budo kanduang. Sanan lah baiyo baantaan sambah jo hati nan amaik suci mungko nan amaik janiah, gayuang balangkah balabek tukang balukih batiruan kato baadiah bakatubah basabuik kato bahiasi lakek lah kato ibaraiknyo kacimpuang pamenan mandi rasian pamenan lalok kok kurang tajajak tajalani jo sambah sajo sayo atok sambah sayo sambah baririk sambah jo malah niniak mamak dikumbalikan salam kabakeh Angku. Salam nan akn dikumbalikan kabakeh Angku takalo adaik badiri mulo limbago kadituang lah sudah cupak adaiek labuah kappa naraco lautan budi tapi tapi samantang pun baitu ampeh hari sasudah itu rapeklah basa ampek balaidi balai balerong panjang kampuang banamo koto ranah dalam nagari Padang Gantiang tali adaik batan g limbago tampuak alua tangkai pusako mamacik kato kabanaran dalam bangka paiwai. Adai limbago iko kini dahulu mato hari tabik timur badarang hari siang lautan medan parahu kato-kato, medan Pangulu siriah jo pinag medan adaik. Tasisik puntiang diulu di bawah kiliran taji asa mulo kato dahulu tigo limbago nantajadi partamo sambah manyambah kaduo baso jo basi katigo siriah jo pinag sambah manyambah dalam adaik tali batali undang-undang tasabuik bamuluik manih bapakai bahaso baik adaik limbago iko kini gayuang balangkah babalabek tukang balukih batiruan kato baadih bakatubah lakeklah kato ibaraiknyo.

Anak urang Batu Palano Badaga batang katindiah

Nak mudiak ka Banuhampu Batang katiko dalam padi

Siriah talatak dalam carano kamilah nyato kamanyira

makanan Sutan jo Panghulu Tando alamaik putiah hati

Lorong kapado kasiriahnyo

Siriahnyo udang tampak arti tampak nan bagai kuku balam latiak bak alam manari jilogak tiuang katabang gagangnyo jawek bajawek rintiangnyo malaingka alam pucuak cawang kalangik buahnyo larang basuo gagang rang ambiiak katanam samusim lamo talatak satuhun dalam paguluangan uash kalayua indak talatak dalam carano

Caranonyo banjar reno ali baukua baaka cino babulan bakapuak-kapuak loyangnyo kuniang manyingaga baru kalau dituang Agam Balai Guah bautan Sariak Sungai Sungai Pua baraok jo dulamk. Dulamak bautang urang Sandiang Baka suri taladan ka Batipuah baukia jo banang ameh batarak jo banang makaf baukia tindia-batindiak tiok suduik babungo tanjuang iyu banamo kabasaran paraok pinang di carano.

Pinang diranh Gunuang Rajo tumbuah dipadang sidaratan batangnyo tinggi linggayuran tinggi nyo jangkau-jangkauan randahnyo jambo-jamboan buahnyo rampak bak bakacubang bulek nan bagai talua buruang putiah sakarek tampak ari nan madok kamato hari iduik siang tarang bak bulan panuah malam bak bulan ampek baleh satahun upiahnyo lareh samusim salodong jatuah lah tupai dek mamanjek alun kasampai kapucuaknyo sakarang kini baitu juo.

Sadahnyo kurang bajantiak sathun dibaka bugih samusim dilangka Cino dikipek jo ambai-ambai diturok jo aia bungo dipacik jo panti santan dipalik jo jari manih bakaja kajari tunjuak cayo naik ka muko merahnyo lakek di bibia mambayang katapak tangan sapalik satia ameh sakadam sapati limo harago nan indak taharagoi satimbang jo nagari jikok di bali indak dijua jiko dimintak dapek sajo

Gambia

Jikok di kaji kagambia nak urang siralamk tumbuah dijirek balai gamba ditanam urng Payokumbuah ditumbak dilasuang tinggi dikamuniang jolong sudah gadih manumbuak jolong gadang ampek baleh duo kali tujuah sapuluah duo kali limo ijau kuniang rupo tak tantu indak nan bukan alang-alang ragulah mato mamandangi itu kapangka baso jo basi.

Timbakau Timbakau sidani ari banamo lumuik tarandam dari rahun dating bijonyo pakirin didayuang dilautan ditanam na urang Batu Taba jangko buatan urang Guguak Sangga nan biru jolong sudah disaik siSanti ameh dijamua si Santi ambun indaknyo masiak dek paneh masiak dek ambun tangah malam saeto panjang jaluanyo sajangka dimankan api usah karatak rangiang tido arun satahun palayiran.

Daun

Jiko dikaji kadaunnyo pisang karang nan baru tumbuah umbuinyo putiah mud-mudo ditanam mandeh Rubiyah diparak dikabun bungo diladang dipabatasan antaro Tiku Pariaman aluih nyo sayok laying-layang dijamua ditapi lauik kariang dilambai-lambai ombak. Malin putiah mangarang sangkok-sangkok dikarang dihalaman kuyah lah siriah baka lah rokok nak sanang hati sipangkalan sakian sajo pasambahan maklum bakeh Angku.